قسمت کی کتابوں کی تحریر بدلتی ہے

باسمہ تعالٰی

قسمت کی کتابوں کی تحریر بدلتی ہے
شبیر کی چوکھٹ پہ تقدیر بدلتی ہے

غش آتا ہے شاہوں کو، دربار لرزتے ہیں
جب لہجہء حیدر میں تقریر بدلتی ہے

ہے کربلا سرور کی اور شام ہے زینب کا
اِسطرح قیادت کی جاگیر بدلتی ہے

کردارِ شہ دیں کا دشمن پہ اثر دیکھو
اک رات میں ہی خوں کی تاثیر بدلتی ہے

لے آئے ہیں اصغر کو مقتل میں شہ والا
اب جنگ کی کربل میں تدبیر بدلتی ہے

ایمان کا مرکز ہے سرور کی عزاداری
یہ زیست کی بنیاد و تعمیر بدلتی ہے

یہ سوچ کے اکثر ہی ہم فرش پہ سوتے ہیں
یاں خواب بدلتے ہیں؟ تعبیر بدلتی ہے

دربارِ ستمگر میں شمشیر سے خطبوں کی
اندازِ وغا شہ کی ہمشیر بدلتی ہے

غیرت کی ردا اوڑھے بلوے میں نبی زادی
قرآنِ تحمّل کی تفسیر بدلتی ہے

چوراہے کبھی کوچے بازار کبھی گلیاں
یوں آلِ محمد کی تشہیر بدلتی ہے

بیمار کو اک پل بھی تسکین نہیں حاصل
ہر ایک قدم اُس پر تعزیر بدلتی ہے

ہر شب تنِ عابد کے زخموں کی عزیت سے
*سو کروٹیں زنداں میں زنجیر بدلتی ہے*

جلتی ہوئی ریتی پر ہے خون میں آلودہ
مقتل میں محمد کی تصویر بدلتی ہے

ننھی سی لحد بن میں شبیر بناتے ہیں
اور اشکِ لہو چشمِ شمشیر بدلتی ہے

ہر ایک قدم پر ہے اک ظلم نیا *عارف*
ہر گام اسیری کی تصویر بدلتی ہے

عسکری *عارف* اکبر پوری

حالِ بیداری میں رہ کر بھی میں خوابوں میں رہا

حالِ بیداری میں رہ کر بھی میں خوابوں میں رہا
جیسے پیاسہ کوئی اک عمر سرابوں میں رہا

مری خوشبو سے معتر تھا گلستانِ وفا
خار مانند مرا یار گلابوں میں رہا

گفتگو تک رہی محدود ملاقات اپنی
مِرا محبوب شبِ وصل حجابوں میں رہا

اب مجھے خاک نشینی کا شرف حاصل ہے
یہ الگ بات ہے کل تک میں نوابوں رہا

پیار ہی پیار تھا تحریر مرے خط میں مگر
جز شکایت نہیں کچھ اُس کے جوابوں میں رہا

میں نے ہر حال میں پرواز کا سیکھا ہے ہنر
کٹ گئے پر مرے پھر بھی میں عقابوں میں رہا

عشق ثابت ہوا نقصان کا سودا *عارف*
صرف گھاٹا ہی  محبت کے حسابوں میں رہا

عسکری *عارف*

میں نے مانا کہ ملاقات نہیں ہو سکتی

میں نے مانا کہ ملاقات نہیں ہو سکتی
تو کیا اب تم سے کوئی بات نہیں ہو سکتی

دل میں روشن ہیں مری جاں تری یادوں کے چراغ
شہرِ الفت میں کبھی رات نہیں ہو سکتی

باطنً قلب و جگر میں ہی بسا لے مجھکو
ظاہرً گر تو مرے ساتھ نہیں ہو سکتی

اسکا شیوہ ہے محبت میں بغاوت کرنا
معتبر اسکی کبھی ذات نہیں ہو سکتی

عشق کا کھیل بھی یہ سوچ کے میں ہار گیا
سچے عاشق کی کبھی مات نہیں ہو سکتی