نوحہ

لہو لہو ہے زمانہ علی شہید ہوئے
یتیم ہو گیا کوفہ علی شہید ہوئے

تمام ریشِ مبارک لہو میں ڈوب گئی
لہو میں تر ہے سراپا علی شہید ہوئے

زمین ہلتی ہے اور آسماں لرزتا ہے
ہے ایک حشر سا برپا علی شہید ہوئے

لحد میں گریہ کناں ہیں رسولِ اکرم بھی
لبوں پہ ہے یہی نوحہ علی شہید ہوئے

ستون حق کا ہوا آج منہدم ہے ہے
نہ گر پڑے کہیں کعبہ علی شہید ہوئے

ہر ایک مفلس و مجبور دے رہا ہے صدا
رہا نہ میرا سہارا علی شہید ہوئے

بتولِ پاک کے گھر میں ہے ایک حشر بپا
صدائیں آتی ہیں بابا علی شہید ہوئے

شکستہ حال ہیں حسنین و زینب و کلثوم
رہا نہ باپ کا سایہ علی شہید ہوئے

خموش بیٹھے ہیں عباس سر جھکائے ہوئے
کئے ہیں صبر گوارا علی شہید ہوئے

ہیں سوگوار جو پردے میں ھادئی دوراں
اُنہیں بھی دیجئے پرسہ علی شہید ہوئے

سسک رہی ہیں لحد میں بتول بھی عارف
سنبھالے پہلو شکستہ علی شہید ہوئے
عسکری عارف

نوحہ

نوحہ
جب  تیغِ  دغا سر پہ ستمگر نے چلائی
سجدے  میں  تڑپنے  لگا ضرغامِ الہی

رنگین ہوئی خوں میں قبا شیرِ خدا کی
ہے خون  میں  اسلام  کی تصویر نہائی

جو فکر میں مسکینوں کی سویا نہ کسی شب
ہے  ہے   اُسی  شبگیر  کو   اب  نیند  ہے  آئی

ہے شور  قیامت  کا  پرندوں  میں دمِ صبح
لو چھوڑ دی شیروں نے بھی اب اپنی ترائی

وہ زہر  میں  ڈوبی  ہوئی  شمشیر کی تاثیر
بے دم  ہوا  اک ضرب  میں خالق  کا  فدائی

رکتا ہی نہیں خوں سرِ اقدس سے علی کے
ہے  پاس  نہ  پٹّی  کوئی  مرحم  نہ دوائی

جز  شکر خدا  لب  پہ نہیں کوئی سخن ہے
اللہ  سے  کیا  خوب   وفا  تم   نے   نبھائی

کیا ظلم  کیا ہے بن ملجم نے  صد  افسوس
ضربت مرے مولا کو ہے سجدے میں لگائی

ہے   محوِ  غمِ   ساقیء   کوثر   یہ   زمانہ
ہے سوگ  بپا عرش  پہ  غمگیں ہے خدائی

تاعمر   جسے  راس   نہیں   آئی   یہ  دنیا
اُس حق کے ولی کی ہوئی دنیا سے جدائی

ہو کیسے  رقم نوحہ  کہ  پھٹتا  ہے کلیجہ
عارف کی نگاہوں میں قیامت ہے سمائی
عسکری عارف