اپنی کرتوت پہ خود آپ پشیماں ہونا
اتنا آساں بھی نہیں دہر میں انساں ہونا
شوقِ ایثار نہیں تیغ کا عریاں ہونا
جوہرِ صبر ہے حق بات پہ قرباں ہونا
تری فرقت میں شبِ ہجر پریشاں ہونا
برسرِ دشتِ جنوں چاک گریباں ہونا
تونے دیکھا ہی نہیں میرا لبِ جاں ہونا
سر بہ دیوار تری یاد میں نالاں ہونا
شب کی وحشت میں مرے دل کا چراغاں ہونا
دیکھکر اپنے ہی سایے کو حراساں ہونا
عہدِ طفلی میں، جوانی میں کوئی فرق نہیں
شہرِ الفت میں تو لازم ہوا ناداں ہونا
ماں، بہن، بیوی و بیٹی بھی یہی بنتی ہے
فخر کی بات ہے انسان کا نسواں ہونا
دل کی وادی میں بپا ہے کوئی ساون ابتک
وہ شبِ وصل ترا زلفِ پریشاں ہونا
ٹوٹ بکھرے ہیں سبھی عہد و وفا کے موتی
ہاے افسوس ترا قاتلِ پیماں ہونا
صبرِ شبیر کا "عارف" یہ کرشمہ دیکھا
تیغِ قاتل کا سرِ دشت رگِ جاں ہونا
سید محمد عسکری عارف
No comments:
Post a Comment