دین و قرآں کی زندگی زہرا
باغِ ایماں کی تازگی زہرا
ہر زمانہ ترا گداگر ہے
تری مقروض ہر صدی زہرا
ترے فاقے ہیں کشتیء اسلام
تو ہے دریائے تشنگی زہرا
مجھ گنہگار کے لبوں سے بھلا
کیسے مدحت ہو آپکی زہرا
ترے قدمو کے پاک ذرّوں سے
ساری دنیا رچی بسی زہرا
چاند سورج کو نور دیتی ہے
ترے چہرے کی روشنی زہرا
شانِ تطہیر و سورہء کوثر
ھل اتیٰ مدح آپکی زہرا
دونو عالم میں غیر ممکن ہے
مثل و تمثیل آپکی زہرا
ترے حسنین مالکِ جنت
تو ہے ملکہ جہان کی زہرا
اس کی تقدیر بن گئی دوزخ
جس نے کی تجھ سے دشمنی زہرا
بنتِ احمد ہے، مادرِ حسنین
باخدا ذوجہء علی زہرا
نعمتیں جتنی ہیں زمانے میں
سب ہیں خیرات آپکی زہرا
دشتِ کربل میں تیرے بچوں نے
دیں کو بخشی ہے زندگی زہرا
تری چادر کی برکتوں کے سبب
ہے یہ دنیا ہری بھری زہرا
نیل و گنگا، فرات اور جمنا
تری خیرات ہر ندی زہرا
خلد جاتی ہیں روٹیاں تیری
تجھ سا کوئی نہیں سخی زہرا
ترا کردار سادگی زہرا
تری خو بندہ پروری زہرا
تو ہے سامانِ بخششِ مومن
تو ہی معراجِ بندگی زہرا
ہے لبوں پر دعا یہ عارف کے
ہو عطا تیری نوکری زہرا
سید محمد عسکری "عارف"
No comments:
Post a Comment