ﮔﺮﯾﮧ ﮐﻨﺎﮞ ﮨﮯ ﭼﺎﻧﺪ ﺗﻮ ﺳﻮﺭﺝ ﮔﮩﻦ ﻣﯿﮟ ﮨﮯ
ﭨﮑﮍﮮ ﮨﻮﺍ ﺣﺴﻦ ﮐﺎ ﮐﻠﯿﺠﮧ ﻟﮕﻦ ﻣﯿﮟ ﮨﮯ
ﺑﺮﭘﺎ ﺟﻮ ﺍﯾﮏ ﺣﺸﺮ ﺳﺎ ﭼﺮﺥِ ﮐﮩﻦ ﻣﯿﮟ ﮨﮯ
ﮈﻭﺑﺎ ﮨﻮﺍ ﺑﺘﻮﻝ ﮐﺎ ﺗﺎﺭﮦ ﮔﮕﻦ ﻣﯿﮟ ﮨﮯ
ﺍﻣﺖ ﻧﮯ ﭘﮭﺮ ﺳﺘﺎﯾﺎ ﮨﮯ ﺑﻨﺖِ ﺭﺳﻮﻝ ﮐﻮ
ﺯﯾﺮِ ﻟﺤﺪ ﺑﺘﻮﻝ ﮐﯽ ﻣﯿﺖ ﮔﮭﭩﻦ ﻣﯿﮟ ﮨﮯ
ﺗﯿﺮﻭﮞ ﻣﯿﮟ ﻣﺠﺘﺒﯽٰ ﮐﺎ ﺟﻨﺎﺯﮦ ﺍﻟﺠﮫ ﮔﯿﺎ
ﺯﺧﻤﻮ ﮐﯽ ﮐﺎﺋﻨﺎﺕ ﮔﻞِ ﭘﻨﺠﺘﻦ ﻣﯿﮟ ﮨﮯ
ﺟﺎﺭﯼ ﮨﮯ ﺧﻮﮞ ﮐﯽ ﺩﮬﺎﺭ ﺑﺪﻥ ﺳﮯ ﺍﻣﺎﻡ ﮐﮯ
ﻣﺠﺮﻭﺡ ﻻﺵِ ﺳﺒﻂِ ﭘﯿﻤﺒﺮ ﮐﻔﻦ ﻣﯿﮟ ﮨﮯ
ﭘﮩﻠﻮ ﻣﯿﮟ ﻧﺎﻧﺎﺟﺎﮞ ﮐﮯ ﻧﻮﺍﺳﮧ ﻧﮧ ﺟﺎ ﺳﮑﺎ
ﮐﺘﻨﯽ ﻏﺮﯾﺐ ﺁﻝِ ﭘﯿﻤﺒﺮ ﻭﻃﻦ ﻣﯿﮟ ﮨﮯ
ﯾﺜﺮﺏ ﻣﯿﮟ ﻣﺠﺘﺒﯽٰ ﮐﮯ ﺟﻨﺎﺯﮮ ﭘﮧ ﺗﯿﺮ ﮨﯿﮟ
ﺗﯿﺮﻭﮞ ﭘﮧ ﮨﺎﺋﮯ ﻻﺷﮧﺀ ﺷﺒﯿﺮ ﺑﻦ ﻣﯿﮟ ﮨﮯ
ﺁﺋﯽ ﺧﺰﺍﮞ ﺍﺟﺎﮌﻧﮯ ﺍﺣﻤﺪ ﮐﮯ ﺑﺎﻍ ﮐﻮ
ﻣﺮﺟﮭﺎﯾﺎ ﺍﯾﮏ ﭘﮭﻮﻝ ﻧﺒﯽ ﮐﮯ ﭼﻤﻦ ﻣﯿﮟ ﮨﮯ
ﻏﺎﺯﯼ ﮐﻮ ﺑﮍﮪ ﮐﮯ ﺭﻭﮎ ﻟﻮ ﺍﮮ ﺷﺎﮦِ ﮐﺮﺑﻼ
ﺍِﺳﺪﻡ ﺟﺒﯿﻦ ﺷﯿﺮِ ﻋﻠﯽ ﮐﯽ ﺷﮑﻦ ﻣﯿﮟ ﮨﮯ
" ﻋﺎﺭﻑ " ﻗﻠﻢ ﮐﻮ ﺭﻭﮎ ﻟﮯ ﻧﻮﺣﮧ ﺗﻤﺎﻡ ﮐﺮ
ﻃﻮﻓﺎﮞ ﺍﻟﻢ ﮐﺎ ﺑﺮﭘﺎ ﺩﻝِ ﺧﺴﺘﮧ ﺗﻦ ﻣﯿﮟ ﮨﮯ
ﺳﯿﺪ ﻣﺤﻤﺪ ﻋﺴﮑﺮﯼ ﻋﺎﺭﻑ-
No comments:
Post a Comment