شریکِ کرب و بلا ہیں محمدِ باقر
فنا کے بن میں بقا ہیں محمدِ باقر
سخا و بخشش و جود و کرم کا دروازہ
امیرِ ملکِ سخا ہیں محمدِ باقر
شعور و حکمت و عقل و خرد کا مرکز ہیں
امامِ دینِ خدا ہیں محمد باقر
عطش کی تیغ سے کاٹی ہے ظلم کی شہ رگ
مثیلِ بنتِ شہا ہیں محمدِ باقر
ہر ایک زخم کا مرہم ہے نام باقر کا
ہر اک مرض کی دوا ہیں محمدِ باقر
پکڑ کے جسکو شریعت سنبھل گئی ایسا
حسینیت کا عصا ہیں محمدِ باقر
بروزِ حشر یقیناََ حضورِ خالق میں
گواہِ ظلم و جفا ہیں محمدِ باقر
مثالِ حیدر و احمد نجات کے ضامن
شفیعِ روزِ جزا ہیں محمدِ باقر
بلا کے دشت سے زندانِ شام تک *عارف*
چراغِ صبر و رضا ہیں محمدِ باقر
سید محمد عسکری *عارف*
No comments:
Post a Comment