شہرِ الفت کی کوئی رسم نبھاتے جاتے
لاکھ روٹھا تھا سہی مجھکو مناتے جاتے
کاش ہو جائے کسی پل ترا دیدار سو ہم
راہ تکتے ہیں تری راہوں سے آتے جاتے
خانہء دل کو دھواں کرکے گھٹن چھوڑ گئے
کیا برا ہوتا اگر دل ہی جلاتے جاتے
چند لمحے کو سہی کچھ تو سکوں مل جاتا
اپنے آنسو مرے زخموں پہ گراتے جاتے
ہم نے سوچا تھا گلے ہمکو لگائے گا مگر
ہاتھ بھی اسنے ملایا نہیں جاتے جاتے
ہے خبر تمکو اجالوں سے ہمیں وحشت ہے
تم شبِ ہجر چراغوں کو بجھاتے جاتے
No comments:
Post a Comment