ایک تازہ طرحی کلام
عباسِ دلاور کی بھتیجی ہے سکینہ
روتی ہے سسکتی ہے بلکتی ہے سکینہ ع.
تاریکیء زنداں میں اکیلی ہے سکینہ ع.
اس واسطے رخسار پہ لگتے ہیں طمانچے
عباسِ دلاور کی بھتیجی ہے سکینہ ع.
کیا جرم ہے کیوں اتنے ستم ڈھاتے ہیں اعدا
بس چار برس کی ہی تو بچی ہے سکینہ ع.
فریاد جو کرتی ہے کبھی یادِ پدر میں
ظالم کے طمانچوں کو بھی سہتی ہے سکینہ ع.
وہ پیاس کا عالم ہے کہ ہڈی سے جدا گوشت
عاشور سے بس اشک ہی پیتی ہے سکینہ ع.
زنداں کا اندھیرا ہے قیامت کا اندھیرا
دو چار قدم چلتی ہے گرتی ہے سکینہ ع.
زندان کے باہر جو نظر آتے ہیں بچے
حسرت سے اُنہیں دیکھ کے روتی ہے سکینہ ع.
کب جائیں گے ہم اپنے وطن اے پھوپھی امّاں
ہر شام پھوپھی سے یہی کہتی ہے سکینہ ع.
یوں ٹوٹ پڑے پھول سی بچی پہ مصائب
بس چار برس سن میں ہی بوڑھی ہے سکینہ ع.
یوں خوف زدہ کرتا ہے زنداں کا اندھیرا
اک گوشے میں سہمی ہوئی بیٹھی ہے سکینہ ع.
سر باپ کا پایا تو بہت روئی یتیمہ
اب موت کی آغوش میں سوتی ہے سکینہ ع.
امید رہائی کی لیے آج بھی دل میں
عارف درِ زندان پہ بیٹھی ہے سکینہ ع.
عسکری عارف
No comments:
Post a Comment