بازار میں دیتی تھیں صدا زینب مضطر

بازار میں دیتی تھیں صدا زینب مضطر

غیور برادر مرے عباس  کہاں ہو

جس روز میں پردیس کو نکلی تھی وطن سے

اک پل کو جدا بھی نہ ہوئے بھائی بہن سے

اب باندھے گئے ہاتھ پسِ پشت رسن سے

پرواز نہ کر جائے کہیں روح بدن سے

بے پردہ ہے اغیار میں اولادِ پیمبر

بے مقنع و چادر ہیں حرم بلوے میں ہائے

بالوں سے ہر اک بیبی ہے چہرے کو چھپائے

خاموش ہے سجاد کھڑا سر کو جھکائے

اس حال میں پھوپھیوں سے نظر کیسے ملائے

مر جائے نہ غیرت سے کہیں عابد مضطر

تھا ناز  مجھے  ہے مِرا  عباس  برادر

ہے 

دیکھے گا بھلا کون مجھے آنکھ اٹھا کر

پردیس میں اجڑا یہ مِرا کیسا مقدر

تم قتل ہوئے لٹ گئی بھیا مری چادر

جاتی ہے رسن بستہ سوئے شام یہ خواہر

ہم  لوگ  تماشا  ہیں  تماشائی  ہے امت

پامال ہوئی جاتی ہے سادات کی حرمت

باقی نہ رہی دل میں مسلمانوں کے غیرت

اللہ رے یہ عترتِ اطہار کی غربت

بے پردہ ہے بازار میں ناموسِ پیمبر

ہر سمت  فقط  مجمعِ اغیار  ہے بھائی

دو چار قدم چلنا بھی دشوار ہے بھائی

پیدل ہیں حرم اور رہِ پُر خار ہے بھائی

زنجیر میں سجاد گرفتار ہے بھائی

دیکھا نہیں جاتا ہے قیامت کا یہ منظر

جن لوگوں سے پردے کا زمانے میں چلن تھا

بے پردہ کبھی جنکو کسی نے نہیں دیکھا

افسوس کہ لوٹا گیا اُن لوگوں کا پردہ

بے پردہ ہوا ہائے محمد کا گھرانا

اللہ رے سادات کا یہ اُجڑا مقدر

ہم نے جو سہے کوئی وہ غم نہیں سکتا

اُمّت کے لیے ایسے الم سہ نہیں سکتا

مر جائے گا، گھُٹ جائے گا دم، سہ نہیں سکتا

گھر والوں پہ یوں ظلم و ستم سہ نہیں سکتا

جو ڈھائے گیے ہم پہ مظالم اے برادر

کس طرح ہو مرقوم قیامت کا وہ منظر

بے پردہ تھیں بازار میں جب دختر حیدر

روتا تھا، بندھا گھوڑے کی گردن سے کوئی سر

عارف جو صدا دیتیں تھیں عباس کی خواہر

آجاؤ کہ اغیار میں زینب ہے کھلے سر

عسکری عارف