نوحہ امام در حال شہادت امام حسن علیہ السلام

گریہ کناں ہے چاند تو سورج گہن میں ہے

ٹکڑے ہوا حسنؑ کا کلیجہ لگن میں ہے

برپا جو ایک حشر سا چرخِ کہن میں ہے

ڈوبا ہوا بتولؐ کا تارہ گگن میں ہے

اُمّت نے پھر ستایا ہے بنتِ رسولؐ کو

زیرِ لحد بتولؐ کی میت گھٹن میں ہے

تیروں میں مجتبٰیؑ کا جنازہ الجھ گیا

زخموں کی کائنات گُلِ پنجتنؑ میں ہے

اُجلا کفن تھا، خوں سے مگر سُرخ ہو گیا

زخموں سے چور سبطِ پیمبرؐ کفن میں ہے

نانا کا پہلو مل نہیں پایا نواسے کو

کتنی غریب آلِ پیمبرؐ وطن میں ہے

یثرب میں مجتبٰیؑ کے جنازے پہ تیر تھے

تیروں پہ ہائے لاشہء شبیرؑ بَن میں ہے

یثرب میں ہائے زہر بھری کیا ہوا چلی

مرجھایا اِک گُلاب نبیؐ کے چمن میں ہے

محوِ فغاں ہیں زینبؐ و کلثومؐ پیٹ کر

وقتِ جدائی مومنو بھائی بہن میں ہے

روتے ہیں مصطفیٰؐ و علیؑ فاطمہؐ حسینؑ

عارفؔ صدائے گریہ بپا انجمن میں ہے