نوحہ درحال شہادتِ بیبی سکینہ
روتا ہے ایک بھائی زندانِ شام میں
خواہر کو موت آئی زندان شام میں
بابا کے سر سے لپٹی روتی رہیں سکینہ
ہچکی قضا کی آئی زندانِ شام میں
زینب یہ کہ رہی ہیں تم مر گئی سکینہ
ہم کو نہ موت آئی زندانِ شام میں
کیا کیا نہ دکھ اٹھاے چھوٹے سے سن میں بیبی
فرصت غموں سے پائی زندانِ شام میں
ہاتھوں میں کپکپی ہے کیسے اٹھے جنازہ
قیدی بنا ہے بھائی زندانِ شام میں
بانو تڑپ تڑپ کے فریاد کر رہی ہے
میری لٹی کمائی زندانِ شام میں
بعدِ حسین جسکے سونے پہ سختیاں تھیں
اب اسکو نیند آئی زندانِ شام میں
جکڑے تھے ہتھکڑی میں عابد کے دونوں بازو
کیسے لحد بنائی زندانِ شام میں
اٹھتا تھا شورِ ماتم لو الوداع سکینہ
تم سے ہوئی جدائی زندانِ شام میں
ڈرتی تھی دیکھکر جو تاریک قید خانہ
ہے ہے وہ جی نہ پائی زندانِ شام میں
اک حشر سا بپا تھا اہلحرم میں عارفؔ
بدلی غموں کی چھائی زندانِ شام میں
عسکری عارف
No comments:
Post a Comment