نوحہ اسیریِ اہلحرم

ہو کر اسیر  جب  کہ حرم  شام کو چلے

بے پردہ اور رسی سے شانے بندھے ہوئے

مقتل سے جب گزرنے  لگی آلِ مصطفٰی

لاشِ حسینؑ دیکھ کے زینبؐ نے  یہ  کہا

جاتی ہے قید ہوکے سوئے شام اب بہن

ہوتی ردا  جو سر پہ تمہیں دیتی میں کفن

کس منہ سے دیکھو لاش تمہاری میں بے کفن

چھوڑا  نہ  اہلِ  ظلم  نے  بوسیدہ  پیرہن

لپٹا ہے خاک و خون میں بھیا ترا بدن

ریگِ  تپاں  پہ  تیرا  بدن  پاش   پاش  ہے

کیسے کروں  یقین  میں تیری یہ لاش ہے

ہے سر  بریدہ  دشت  میں  زہرا کا گلبدن

لائے تھے اپنے  ساتھ  بڑی شان سے مجھے

پردیس میں  بچھڑ  گئی زینب حسینؑ سے

تم سے بچھڑ کے جی نہیں پائے گی یہ بہن

گھوڑوں سے جبکہ لاش تمہاری کچل گئی

اُس وقت میرے قلب پہ تلوار چل گئی

ہاتھوں کو ملتی رہ گئی زینبؐ بصد محن

عباسؑ قتل ہو  گئے  اکبرؑ  بھی  مر گیے

قاسمؑ شہید ہو گیے اصغرؑ بھی مر گیے

اک دوپہر میں قتل ہوئی ساری انجمن

قیدی  ہے،  ناتواں  ہے   بڑا   بدنصیب  ہے

عابد کا حال  رنج  و الم  سے  عجیب  ہے

غیرت سے مر نہ جائے یہ سجاد خستہ تن

ہیں بے کجواوہ  اونٹ، نہیں ہیں عماریاں

جائیں گی کیسے شام کو بے پردہ  بیبیاں

اُس پر ستم کہ ہاتھوں میں باندھی گئی رسن

تکتے ہوئے شہیدوں کو لاشوں یاس سے

مقتل  سے  ہائے   اہلحرم  شام  کو  چلے

عارفؔ تھے لب پہ ثانیِ زہرا کے یہ سخن