مرثیہ مولا علی علیہ السلام

اے مومنو  علیؑ کی  شہادت کے روز ہیں

ماتم کے  روز  ہیں یہ عبادت کے روز ہیں

حلال مشکلات  کی رخصت کے روز  ہیں

حسنینؑ کی یتیمی کے غربت کے روز ہیں

آتی  ہے  آسماں  سے صدا  کیا غضب ہوا

سجدے  میں  قتل  سیدِ  عالی نسب ہوا

آئی صدا  جو  زخمی  ہوئے  شیرِ  ذوالجلال

سن کر  صدا یہ زینبؐ و کلثومؐ تھیں نڈھال

بابا کو  گھر  میں  لائے جو حسنینؑ پر ملال

رنگیں لہو سے ریشِ مبارک تھی، سر کے بال

خوں   میں  نہایا   فاتحِ   بدر  حنین   تھا

کوفہ میں یا علیؑ کا فقط شور و شین تھا

زخمی ہے  سر   امام   کا  شدت  کا درد ہے

خوں کی  کمی سے آپکا چہرہ بھی ذرد ہے

بستر  پہ  ہائے  موت   کے  خیبر کا مرد ہے

غمگین   اہلبیت   کا   ہر    ایک   فرد   ہے

بے چینی اِسقدر ہے نہ سوتے  ہیں مرتضٰیؑ

بچوں کو روتا دیکھ کے روتے ہیں مرتضٰیؑ

پڑتی  تھی جب بھی  زینؐب و کلثومؐ  پر نگاہ

ہوتی   تھی   اور  حالتِ  مولائے   حق    تباہ

بستر  پہ  تھر تھراتے   تھے عالم  کے  بادشاہ

پھر کھینچتے تھے کرب  کے عالم میں ایک آہ

خیموں کی سمت شام کا لشکر نظر  میں  تھا

زینؐب  کی  بے  ردائی کا  منظر  نظر  میں تھا

آیا ہے جب طبیب تو منظر عجیب تھا

زخمِ  امام  دیکھ  کے تھرا  کے  رہ گیا

بولا کہ زہر جسم میں پھیلا ہے جا بجا

اب زندگی کا کوئی بھی چارہ نہیں رہا

مولا سے عاشقوں کی جدائی قریب ہے

اب روح کی  بدن سے  رہائی قریب ہے

بولا   طبیب  دودھ  ہے  اس وقت کارگر

کم  ہوگا  زہرِ   تیغ  کا   تھوڑا  بہت   اثر

پہنچی ہے جب یتیموں میں کوفہ کے یہ خبر

نکلے وہ دودھ کوزوں میں لیکر بچشمِ تر

لب پر دعا تھی اے مرے مالک دہائی ہے

ضربت مرے امام نے سجدے میں کھائی ہے

ناگاہ   ایک   شور     اٹھا    وا    مصیبتا

دنیا سے  کوچ  کر  گیا  بھائی  رسول کا

اے  اہل   کوفہ   گریہ  و  ماتم  کرو  بپا

اٹھتا ہے اب   جہاں  میں  جنازہ امام کا

آہ   و  بکا   و  نالا   رثائی  کا  وقت  ہے

پہلے  امامؑ  سے  یہ  جدائی کا  وقت ہے

عسکری عارف