تازہ غزل
ہجر آباد کرکے روتے ہیں
خود کو برباد کرکے روتے ہیں
روز فریاد کرکے روتے ہیں
ہم تمہیں یاد کرکے روتے ہیں
ہنس کے کہتے ہیں داستاں اپنی
ختم روداد کرکے روتے ہیں
کیسے قیدی ہیں ہم کہ اہل جفا
ہم کو آزاد کر کے روتے ہیں
سخت ظالم ہیں آپ بھی عارف
خود پہ افتاد کر کے روتے ہیں
عسکری عارف
تازہ غزل
عشق کرنے کا یہ انجام بھی ہو سکتا ہے
اک بھلا آدمی بدنام بھی ہو سکتا ہے
چھین لیتا ہے سکوں عشق دوا ایسی ہے
زہر بن جائے تو آرام بھی ہو سکتا ہے
عشق چھپ چھپ کے کیا جائے یہی بہتر ہے
کھل گیا راز تو کہرام بھی ہو سکتا ہے
یوں تو لاکھوں ہیں خریدار مگر تیرے لئے
دل مرا یوں ہی ترے نام بھی ہو سکتا ہے
جس پہ تجھ کو ہے یقیں خود سے زیادہ مرے دوست
وہ سگِ بستیء اوہام بھی ہو سکتا ہے
بے سبب ملتا ہے اب کون کسی سے عارف
تجھ سے اسکو تو کوئی کام بھی ہو سکتا ہے
عسکری عارف
خدارا ختم ہو اب انتظار آ جاؤ
اے وارثِ شہ دل دل سوار آ جاؤ
بتائے جاتے نہیں اب یہ انتظار کے پل
گراں ہیں مجھ پہ یہ لیل و نہار آ جاؤ
خزاں کی نزر نہ ہو جائے گلشنِ امید
اے گلستانِ نبی کی بہار آ جاؤ
گزر گئی ہیں تمہارے فراق میں صدیاں
ہے بے قرار دلوں کی پکار آ جاؤ
حسین والے ہیں اب بھی سناں کی نوکوں پر
یزیدیت ہے زمانے پہ بار آ جاؤ
قصاصِ خونِ حسینِ غریب کی خاطر
ہے سیفِ شیر خدا بے قرار آ جاؤ
عسکری عارف
باسمہ سبحانہ
طرح- *زمانے کے محمد تیرا جلوہ ہم بھی دیکھیں گے*
شبابِ حضرتِ شاہِ مدینہ ہم بھی دیکھیں گے
امامِ عصر کا پُرنور چہرہ ہم بھی دیکھیں گے
ادا ہوگی نماز اپنی امامِ وقت کے پیچھے
زمینِ آب پر اُن کا مصلّہ ہم بھی دیکھیں گے
پھٹے گی پھر سے دیوارِ حرم قائم کی آمد پر
جدارِ خانہء کعبہ کو ہنستا ہم بھی دیکھیں گے
جلے گا تیغِ حیدر کی تپش میں دشمنِ زہرا
زوالِ قوّتِ آلِ امیہ ہم بھی دیکھیں گے
*علم کاندھے پہ غازی کا، علی کی تیغ ہاتھوں میں*
*زمانے کے محمد تیرا جلوہ ہم بھی دیکھیں گے*
علی کے شیر کی ہیبت نظر آئے گی مقتل میں
یزیدی فوج پر غازی کا حملہ ہم بھی دیکھیں گے
کسی کے جسم پر جکڑی ہوئی زنجیر کا بدلا
کسی کے ہاتھ میں رسّی کا بدلا ہم بھی دیکھیں گے
ہیں جسکے نور سے روشن ستارے چاند اور سورج
اُسی شمعِ ھدایت کا اجالا ہم بھی دیکھیں گے
چھٹے گی رات باطل کی، سحر ہوگی عدالت کی
جبینِ عرشِ ایماں پر سویرا ہم بھی دیکھیں گے
ہے دل میں حسرتِ دیدارِ مولائے زمن *عارف*
یقیں ہے ایک دن قائم کا چہرہ ہم بھی دیکھیں گے
سید محمد عسکری *عارف* اکبرپوری
مسدّس مولا عباس کی شان میں---
لشکرِ شاہِ شہیداں کا علمدار ہوں میں
کاروانِ شہِ مظلوم کا سردار ہوں میں
ثانیء شیرِ خدا، دین کی دیوار ہوں میں
جسکی تمثیل نہیں ہے وہ وفادار ہوں میں
پیاس پانی کی بجھائے جو وہی پیاس ہوں میں
میں تمنائے علی ہوں سخی عباس ہوں میں.
اپنی پہچان زمانے کو عیاں کرتا ہوں.
آج میں اپنی حقیقت بھی بیاں کرتا ہوں.
میں تو باطل کے ارادوں کو دھواں کرتا ہوں.
اپنی نظروں سے جدا جسم سے جاں کرتا ہوں
کربلا میں نہیں تلوار چلائ میں نے.
اپنی ہیبت سے ہی جیتی ہے ترائ میں نے.
ہم اگر آئںگے میدان میں شیروں کی طرح.
سر نظر آئںگے اڑتے ہوئے پتوں کی طرح.
تن بکھر جائںگے اورآق کے ٹکڑوں کی طرح.
خونِ رگ برسےگا طوفان کے دھاروں کی طرح.
نہر ہوگی نہ کوئ جنگ کا منظر ہوگا.
دشتِ کربل تو فقط خوں کا سمندر ہوگا.
میں اگر چاہوں تو چلّو میں سما لوں دریا.
یہ زمیں کیا ہے ستاروں سے نکالوں دریا.
زور سے اپنی نگاہوں کے اٹھا لوں دریا.
کاٹ کے تیغ سے خیمے میں بہا لوں دریا.
تاقیامت در و دیوار سے پانی نکلے.
مرے اک اِذن پے سنسار سے پانی نکلے.
ساری دنیا میں ہے مشہور سخاوت میری.
دِل ہلاتی ہے لعینوں کا شجاعت میری.
آسماں لرزاں ہے سن سن کے خطابت میری.
خاک کر دیتی ہے بجلی کو جلالت میری.
چاند شرماتا ہے چہرے کی چمک سے میری.
یہ زمیں ہلتی ہے پیروں کی دھمک سے میری.
مرضیء حضرتِ شبیر اگر پا جاؤں.
جانبِ نہر کو بس کچھ ہی پلو میں جاؤں.
دشمنِ دیں پہ گھٹا موت کی میں برساؤں.
فوجِ اعدا کو قیامت کا سماں دکھلاؤں.
لشکرِ شام کو میں موت نظر آؤںگا.
بھر کے مشکیزے میں دریا کو اٹھا لاؤںگا.
کربلا میں نظر آیا مری ہیبت کا اثر.
مری آمد سے ہی لرزاں تھے سبھی بانیء شر.
پاؤں رکھتے تھے اِدھر خوف سے پڑتا تھا اُدھر.
ٹوٹے نیزے نے اڑا ڈالے جفاکاروں کے سر.
میرے اک وار سے میداں میں تباہی آئ.
ٹوٹے نیزے سے ہی مقتل میں قیامت چھائ.
قدمِ شبیر کی مٹی سے محبت ہے مجھے.
حکمِ آقا پہ عمل کرنے کی عادت ہے مجھے.
خدمتِ شاہ سے اک پل کہاں فرصت ہے مجھے.
اس قدر سیدِ ابرار سے قربت ہے مجھے.
اپنے آقا پہ دل و جان سے قربان ہوں میں.
حشر تک سبطِ پیمبر کا نگہبان
ہوں میں.
پرچموں کا جو ہے سلطان، علم میرا ہے.
دینِ احمد کا نگہبان، علم میرا ہے.
اہلِ ایمان کی پہچان،علم میرا ہے.
ذیشرف بالا و ذیشان، علم میرا ہے.
جب فضا میں یہ علم شان سے لہراتا ہے.
عرش سے چومنے جبریل چلا آتا ہے.
محمد عسکری عارف---------
