غزل

تازہ غزل آدمی

دنیا  و  مال و زر  کا پرستار آدمی
رہتا ہے مشکلوں میں گرفتار آدمی

جسکو بھی دیکھئے ہے وہ مکار آدمی
کیا مٹ چکے ہیں صاحبِ کردار آدمی

ہوتی نہیں ہے جسکو میسر غزائے روح
ہوتا ہے اصل میں وہی بیمار آدمی

باقی کسی میں ضبط کی قوت نہیں رہی
کھینچے ہے بات بات پہ تلوار آدمی

کرتا ہے جھوٹ بات بڑے شوق سے مگر
سچ بولنے سے کرتا ہے انکار آدمی

حاکم بہت سے ملک میں میرے ہوئے مگر
کوئی ہوا نہ تم سا کلاکار آدمی

یوں تو ہمارا حلقہء احباب تھا وسیع
پھر کیوں مدد کو آئے فقط چار آدمی

مجرم قرار پائی عدالت غریب کو
عزت سے پھر بری ہوا زردار آدمی

پھیلاؤ ہاتھ صرف خدا کے حضور میں
بننا ہے گر زمانے میں خدار آدمی

ادنی سا ہے یہ اپنا تعارف اے *عسکری*
میں اک حقیر عبد، گنہگار آدمی

عسکری *عارف*

غزل

غزل

کوئی ہمدم نہ کوئی یار نہ شیدائی ہے
حوصلہ دینے کو باقی مری تنہائی ہے

اِن دنوں گھر سے نکلتے ہوئے گھبراتا ہوں
ملک میں میرے تنفر کی گھٹا چھائی ہے

وہ سرِ عام مجھے جھوٹا بتاتا ہے مگر
ہے خبر اسکو مری بات میں سچائی ہے

نوکِ نیزہ کی بلندی بھی گوارہ ہے مجھے
سر جھکا لینے میں شامل مری رسوائی ہے

ایک مدت میں رہا جھوٹوں میں مکاروں میں
تب کہیں جاکے سیاست کی کلا آئی ہے

کیا کبھی چومے گا یہ آسماں قدموں کو مِرے
یا کہ لکھی مری تقدیر میں پسپائی ہے

جینا مشکل ہوا اس دور میں انساں کے لئے
جس طرف دیکھو وہاں معرکہ آرائی ہے

زندگی ایسا ہے اسٹیج کہ جس پر *عارف*
آدمی خود ہی تماشہ ہے، تماشائی ہے
عسکری عارف

نعت

باسمہ تعالٰی
نعت

امیر المومنیں کے قائد و سردار کیا ہوں گے
*علی جنکے غلاموں میں ہیں وہ سرکار کیا ہوں گے*

کمالِ حسنِ یوسف پر زلیخا مر مٹی تھی تو
جمالِ فخرِ یوسف پر ترے آثار کیا ہوں گے

مجھے تو خاکِ پائے احمدِ مرسل سے نسبت ہے
مری خاطر بھلا یہ درہم و دینار کیا ہوں گے

اکیلے نور سے ہی جسکے سورج ماند پڑ جائے
ردائے انّما میں پانچ وہ انوار کیا ہوں گے

ہے خاکِ کربلا اِنکے لئے ہر مرض کا نسخہ
عزادارانِ شاہِ کربلا بیمار کیا ہوں گے

بغیرِ وحیء خالق جسکے لب حرکت نہ کرتے ہوں
خدا جانے پھر اُسکی فکر کے معیار کیا ہوں گے

اگر ہوں ساتھ میں سایہ کی طرح حیدرِ کرّار
برائے خدمتِ سرکار پھر فرّار کیا ہوں گے

خدا جسکا ثناگر ہو سرِ عرشِ عُلی *عارف*
تو پھر مدحت میں اُسکی یہ ترے اشعار کیا ہوں گے

عسکری *عارف*

نعت

باسمہ تعالٰی

دنیائے مودّت کی ہر حد سے گزر جانا
ہے زیست محمّد کے کردار پہ مر جانا

عاشق ہیں محمّد کے، ہم بات کے پکّے ہیں
سیکھا ہی نہیں ہم نے وعدوں سے مکر جانا

اے کاش کہ مل جاؤں میں خاکِ مدینہ میں
مجھکو ہے طلب اُنکی گلیوں میں بکھر جانا

سورج سے ستاروں سے دریاؤں، فضاؤں سے
ہم نے اے نبی تمکو تاحدِّ نظر جانا

جب دستِ مبارک پر گویا ہوئے سنگریزے
تب عشقِ محمّد کا دنیا نے اثر جانا

ہاں وعدہء طفلی کی بنیاد محمّد ہیں
تعمیلِ رسالت ہے نیزے پہ بھی سر جانا

اُسکو ہی میسّر ہے مرضیء خداوندی
احمد کی محبت کا جس نے بھی ہنر جانا

تلواروں میں سو جانا حیدر کا بتاتا ہے
*جینے کی علامت ہے سرکار پہ مر جانا*

اک بار سفینہ پر لکھ نام محمّد کا
طوفاں سے بہ آسانی پھر ہوکے گزر جانا

اظہارِ مودّت کا اک یہ بھی طریقہ ہے
جاں قلب و جگر اُنکی دہلیز پہ دھر جانا

حالات کا مارا ہوں روضہ پہ بلا لیجئے
کب میرا زمانے نے ہے دردِ جگر جانا

جل جائیں گے بال و پر، آگے نہ قدم رکھنا
تم منزلِ سدرہ پر جبریل ٹھہر جانا

جو دشمنِ احمد ہے، انساں نہیں ہو سکتا
احمد سے عداوت ہے احساس کا مر جانا

اعجاز سوا اِس سے اب ہو ہی نہیں سکتا
قرآں کا دلِ ختمِ مرسل پہ اُتر جانا

بن حبِّ نبی بےجا ہر ایک عبادت ہے
اک سیر سپاٹا ہے اللہ کے گھر جانا

وہ ہیرے جواہر کو بس دھول سمجھتا ہے
جس نے کفِ احمد کے ذرّوں کو گہر جانا

اطرافِ محمد میں کچھ سورما ایسے تھے
جن لوگوں نے میداں میں جانا تو مفر جانا

سرکار کی الفت نے کیا عزم دیا *عارف*
قطرہ تھا مگر مجھکو دنیا نے بھنور جانا

عسکری *عارف*