قصیدہ

کیا بتاؤں میں کیا حسین سے ہے
سید الانبیا حسین سے ہے

جس نے بخشی ہے زندگی حق کو
ہاں وہی کربلا حسین سے ہے

جس سے ملتی ہے موت کو بھی حیات
ہاں وہ خاک شفا حسین سے ہے

عشق کی ابتدا تھی آدم سے
عشق کی انتہا حسین سے ہے

ناخدائے سفینہ ہائے نجات
خلد کا راستہ حسین سے ہے

مرکزِ انقلاب ذاتِ حسین
حریت کی بقا حسین سے ہے

جو بھی چاہو وہ مانگ لو آکر
درِ امید وا حسین سے ہے

چاند سورج یہ کہکشاں تارے
روشنی جابجا حسین سے ہے

کچھ بھی ہو جائے رد نہیں ہوگی
میں نے مانگی دعا حسین سے ہے

حق شناسی اُسے نہیں حاصل
جو نہیں آشنا حسین سے ہے

مری خوشیاں بھی ہیں حسین حسین
درد و غم کی دوا حسین سے ہے

ہر صدی میں ہر اک زمانے میں
ظلم کا خاتمہ حسین سے ہے

ساری دنیا کے حق پرستوں کا
عزم فولاد سا حسین سے ہے

بخدا کوئی کر نہیں سکتا
کام جو بھی ہوا حسین سے ہے

فہم و ادراک، علم و عقل و شعور
مجھکو سب کچھ ملا حسین سے ہے

مختصر ہے یہی برائے حسین
راضی خود کبریا حسین سے ہے

غمِ شبیر ہی کا صدقہ ہیں
آنسوؤں کی بقا حسین سے ہے

منحصر ہے حسین پر محشر
ہاں جزا اور سزا حسین سے ہے

دیکھ لوں روضہ شاہ کا *عارف*
بس یہی التجا حسین سے ہے
عسکری *عارف*

سلام

سلام سفرِ عشق
کلام عسکری عارف

عصمت کے آسماں کے ستارے سفر میں ہیں
ایماں کی رہگزر پہ اجالے سفر میں ہیں

اے آفتاب اپنی تمازت کو ضبط کر
بنت نبی کی گود کے پالے سفر میں ہیں

قرآن بھی نکل پڑے جزدان چھوڑ کر
آیات ہیں سفر میں سپارے سفر میں ہیں

مہندی بیاہ نیگ دلہن سرخ پیرہن
صغری کی حسرتوں کے جنازے سفر میں ہیں

خواہر کی یاد میں ہے برادر کی آنکھ نم
اشکِ غمِ فراق کے دھارے سفر میں ہیں

ہیں پُر سکون، سوچ کے یہ بیبیاں تمام
ہمراہ اپنے سارے سہارے سفر میں ہیں

کس شان سے چلی ہیں نبی کی نواسیاں
اٹھارا بھائیوں کے حوالے سفر میں ہیں

اک دوسرے سفر کی بھی تصویر دیکھئے
چوتھے امام طوق سنبھالے سفر میں ہیں

یثرب سے کربلا کوئی پیدل نہیں چلا
واپس ہوئے تو پاؤں کے چھالے سفر میں ہیں

عارف نہ تھم سکے گا کبھی عشق کا سفر
اب بھی سناں پہ حق کے جیالے سفر میں ہیں

عسکری عارف

غزل

غزل
کیوں یہ کہتے ہو کہ ایسا نہیں ہونے والا
آدمی چاہے تو پھر کیا نہیں ہونے والا

خواہشیں ہوتی ہیں انسان کی فطرت میں نہاں
کوئی انسان فرشتہ نہیں ہونے والا

منصب و تخت و زر و لعل و گہر اپنی جگہ
مجھ سے احساس کا سودا نہیں ہونے والا

ایک ہی بار میں جاں ہار چکا لٹ بھی چکا
اب مجھے عشق دوبارا نہیں ہونے والا

یوں تو ہوتا ہے ہے ہر اک مرض کا نسخہ لیکن
عشق کا روگ تو اچھا نہیں ہونے والا

لاکھ روشن ہوں دیے یا کوئی سورج نکلے
شہرِ ظلمت میں اجالا نہیں ہونے والا

سر مرا کاٹ کے نیزے پہ چڑھا دے ظالم
مجھ سے بیعت کا ارادہ نہیں ہونے والا

زیرِ خنجر جو کرے شکر کا سجدہ عارف
آدمی اب کوئی ایسا نہیں ہونے والا
عسکری *عارف*

غزل

خود سے بیزار ہو گیا ہوں میں
کتنا دشوار ہو گیا ہوں میں

چبھ رہا ہوں سبھی کی آنکھوں میں
کیا کوئی خار ہو گیا ہوں میں

اب کسی کو بھی میں قبول نہیں
ایسا انکار ہو گیا ہوں میں

عشق کرنا ہے گر گناہ تو سن
ہاں گنہگار ہو گیا ہوں میں

اب مجھے کوئی ٹوکتا ہی نہیں
یوں سمجھدار ہو گیا ہوں میں

میری آنکھوں کو خواب چبھنے لگے
ایسا بیدار ہو گیا ہوں میں

خود ہی مجبور خود ہی جابر بھی
خود ہی مختار ہو گیا ہوں میں

مجھکو ہونا تھا دہر میں انساں
سو عزادار ہو گیا ہوں میں

غزل

حضرت جون ایلیا کی نذر

سوچتا   ہوں   میں   اطمنان   میں   کیا
خود غرض  سب ہیں اِس جہان میں کیا

تیرے  ہونٹوں  کا زہر   پینے سے
جان آئے گی میری جان میں کیا

ایک  شیشی  بھی   زہر  کی  نہ  ملی
کچھ بھی رکھتے نہیں دکان میں کیا

بام و دیوار  و در ہیں گرنے کو
کوئی رہتا نہیں مکان میں کیا

چند قدموں میں تھک گئے تم تو
کانٹے  پڑنے  لگے  زبان  میں  کیا

یہاں پھولوں کا کچھ وجود نہیں
صرف کانٹے ہیں گلستان میں کیا

مثل ِ   دیوار     دو  دلوں   کے     لئے
میں بھی حائل ہوں درمیان میں کیا

حال   اپنا  بھی  ہے   فقیروں  سا
کچھ کمی ہے ہماری شان میں کیا

پاؤں رکھتے نہیں زمین پہ کیوں
تم بھی  رہتے ہو  آسمان میں کیا
عسکری عارف