ہیبت سلام

ہلتی ہے زمیں دیکھکے جرّار کی ہیبت
اللہ رے یہ َشہ کے علمدار کی ہیبت

ہے تخت پہ حاکم وہ مگر کانپ رہا ہے
ہے دل میں ستمگر کے بیمار کی ہیبت

مانا کہ گرفتارِ ستم شیر ہے لیکن
زنجیر ابھی توڑےگی مختار کی ہیبت

ٹکراتی ہیں رہ رہ کے حدِ شام سے فوجیں
کربل میں تھی یہ شاہ کی تلوار کی ہیبت

ظالم جو سرِدار زباں کاٹ رہے ہیں
ہے دار پہ یہ میثمِ تمار کی ہیبت

بیعت کے تلبگار فنا ہو گئے دیکھو
یہ ہے مرے شبیر کے انکار کی ہیبت

منہ پھیر کے ہرگز کبھی روتے نہ یزیدی
ہوتی نہ اگر اصغرِ جرار کی ہیبت

حاکم تو کئ رات سے سویا ہی نہیں ہے
اے بیبی یہ ہے آپکی گفتار کی ہیبت

سر کاٹ دیا پھر بھی ستم خوف زدہ ہے
نیزے پہ ہے یہ سیدِ ابرار کی ہیبت

عارف یوں ستاتا ہے لعینوں کو ترا ڈد
خنجر سے جدا ہے ترے اشعار کی ہیبت.

التماسِ دعا--- محمد عسکری عارف------

جس گھر میں بپا ماتم سرور نہیں ہوتا

جس گھر میں بپا ماتمِ سرور نہیں ہوتا
وہ گھر تو جہنم ہے وہ گھر گھر نہیں ہوتا

سنکر غمِ شبّیر جو نہ اشک بہائے
دنیا میں کوئی ایسا بھی پتّھر نہیں ہوتا

یہ زینب و سجاد کی محنت کا اثر ہے
ورنہ غمِ شبّیر بھی گھر گھر نہیں ہوتا

بِن مانگے جو دے دے یونہی جنّت کی ضمانت
شبّیر کوئی آپسا رہبر نہیں ہوتا

اک بار اگر اذنِ وغا شیر کو ملتی
پھر دشت میں نو لاکھ کا لشکر نہیں ہوتا

یہ تو مرے مولا کا چمتکار تھا ورنہ
فطرس تری قسمت میں کبھی پر نہیں ہوتا

تاریخ میں لشکر تو نظر آئے ہیں لاکھوں
لشکر ہی کوئی مثلِ بہتّر نہیں ہوتا

یوسف تو یہی سوچ کے حیران ہیں کب سے
کیوں جون سے بڑھکے کوئی سُندر نہیں ہوتا

یہ راز کھلا فرش پہ اشکوں کو بہاکر
آنکھوں سے بڑا کوئی سمندر نہیں ہوتا

سوکر یہی محسوص ہوا فرشِ عزا پر
اس فرش سے بہتر کوئی بستر نہیں ہوتا

جِس حلق کو چوما ہو محمد سے نبی نے
اُس حلق کی تقدیر میں خنجر نہیں ہوتا

جس پر نہ بیاں ہوں مرے مولا کے فضائل
وہ مسندِ ابلیس ہے، منبر نہیں ہوتا

اشعار کہاں میرے کہاں فکرِ انیسی
ذرّہ کبھی خورشید کے ہمسر نہیں ہوتا

یا رب تو دکھا جلد مجھے روضہء سرور
عارف کو کہیں چین میسّر نہیں ہوتا.

التماسِ دعا- محمد عسکری عارف--

پرغم صدائے غیب فلک سے آئی ہے

نوحہ

پُرغم صدائے غیب فلک سے یہ آئی ہے
سجدے میں تیغ شیرِ الٰہی نے کھائی ہے

محوِ نمازِ صبح تھے مولائے کائنات
تلوار چھپ کے سر پہ لعیں نے لگائی ہے

دنیا میں چند روز کا میھمان ہے علی
شیعوں سے اب امام کا وقتِ جدائی ہے

حسنین رو رہے ہیں عماموں کو پھینک کر
مسجد میں ایک بدلی مصائب کی چھائی ہے

گہرا ہے زخم سر پہ ہیں کپڑے لہو میں تر
خوں میں امامتوں کی امامت نہائی ہے

مسجد میں رو رہے ہیں تڑپکر حسن حسین
لپٹا ہوا کلیجے سے بھائی کے بھائی ہے

تنویر جسکی پھیلی تھی سارے جہان میں
ظالم نے دیکھو آج وہ شمّع بجھائی ہے

کیسا ستم ہوا یہ شہ ذوالفقار پر
ہے سرخ آسماں تو زمیں تھرتھرائی ہے

اب کون ہوگا بیووں یتیموں کا مددگار
مسکین روکے کہتے ہیں یا رب دہائی ہے

چالیس دن بجھی تھی جو تلوار زہر میں
ضربت اُسی سے سر پہ علی کے لگائی ہے

*عارف* پچھاڑیں کھاتی تھیں حیدر کی بیٹیاں
بیٹوں نے جبکہ باپ کی میت اٹھائی ہے

سید محمد عسکری *عارف* اکبرپوری

زخمی ہوا ہے شیر خدا کا نماز میں

باسمہ تعالٰی

تازہ نوحہ درحال شہادتِ مولائے کائنات علی ابن ابی طالب علیہ السلام

زخمی ہوا ہے شیر خدا کا نماز میں
ظالم نے روزہ دار کو مارا نماز میں

تیغِ دغا سے ہو گیا مولا کا سر شگاف
تڑپا کیا حسین کا بابا نماز میں

واللہ ہو گیا ہے علی آج کامیاب
لب پہ ہے بس علی کے یہ کلمہ نماز میں

زلفیں لہو ہیں، ریشِ مبارک لہو لہو
خوں میں ہے تر امام کا چہرہ نماز میں

کیسا یہ ظلم کر دیا ظالم نے ہائے ہائے
مولائے کائنات کو  مارا  نماز میں

روتے ہیں سر کو پیٹ کے سائل یتیم سب
چھوٹا جہاں سے سبکا سہارا نماز میں

رو رو کے حالِ زینب و کلثوم ہے تباہ
بچوں نے پایا باپ کا صدمہ نماز میں

بے ساختہ لرز گئے حسنین اُس گھڑی
دیکھا جو باباجاں کو تڑپتا نماز میں

پیدا ہوا تھا گھر میں جو اللہ کے وہی
خالق کی بارگاہ میں پہنچا نماز میں

سر ہے شگاف یا کہ ہے قرآن تار تار
ٹکڑے ہوا ہے نہجِ بلاغہ نماز میں

*عارف* لبِ علی پہ بجز شکرِ کبریا
اک لفظِ بددعا بھی نہ آیا نماز میں

سید محمد عسکری *عارف* اکبرپوری

لہولہان ہے دیں کا شباب سجدے میں

باسمہ تعالٰی

نوحہ درحال شہادتِ مولائے کائنات علی ابن ابی طالب علیہ السلام

لہو لہان ہے دیں کا شباب سجدے میں
تڑپ رہے ہیں علی بوتراب سجدے میں

لگی جو ضرب تو مولا نے چیخ کر یہ کہا
خدا قسم میں ہوا کامیاب سجدے میں

چلی جو ظلم کی تلوار سر پہ مولا کے
خدا کا شیر نہ لا پایا تاب سجدے میں

یہ کہکے ڈوب گئے آسمان میں تارے
ہوا غروب مِرا آفتاب سجدے میں

سماں یہ دیکھ کے ہلتی ہے مسجدِ کوفہ
امامِ دیں کو بصد اضطراب سجدے میں

وہ جسکے سجدوں پہ خود ناز کرتے تھے سجدے
ہوا شہید وہ عالیجناب سجدے میں

لو آج گلشنِ اسلام پھر ہوا برباد
کچل اٹھا ہے علی سا گلاب سجدے میں

لگا کے ضرب علی پر بتا بنِ ملجم
کِیا ہے کیسا یہ کارِ عذاب سجدے میں

بہت ہی پیاسہ تھا زہرا کا لال وقتِ ذبح
دیا کسی نے نہ اک قطرہ آب سجدے میں

تھا جسکا فیضِ کرم عام سارے عالم پر
گرا وہ علم و محبت کا باب سجدے میں

لہو بہاتی ہیں رو روکے آیتیں *عارف*
لہو لہو ہے خدا کی کتاب سجدے میں

سید محمد عسکری *عارف*

عزا و مجلس و ماتم علم سے ڈرتے ہیں

باسمہ تعالٰی

عزا و مجلس و ماتم علم سے ڈرتے ہیں
یزید والے شہ دیں کے غم سے ڈرتے ہیں

عدد میں ہم سے زیادہ ہیں منکرانِ حسین
عجیب بات ہے پھر بھی وہ ہم سے ڈرتے ہیں

ہے امن اور امامِ حسن سے بغض اِنہیں
اسی لئے تو یزیدی قلم سے ڈرتے ہیں

خود اِنکا سامنا کرنے سے موت ڈرتی ہے
نہیں حسین کے عاشق عدم سے ڈرتے ہیں

قلیل لشکرِ ایماں ہے کربلا میں مگر
کثیر لشکرِ شیطان کم سے ڈرتے ہیں

سعودی، داعش و امریکہ اور اسرائیل
بس ایک چھوٹے سے ملکِ عجم سے ڈرتے ہیں

جو رات بھر نہیں سوئے علم کی چاہت میں
وہ لوگ آج جلوس و علم سے ڈرتے ہیں

ہمیں ہے جان سے بڑھکر عزیز شاہ کا غم
یہ مت سمجھنا عزادار بم سے ڈرتے ہیں

اسیر ہوگئے اہلحرم مگر *عارف*
یزیدیت کے سپاہی حرم سے ڈرتے ہیں

سید محمد عسکری *عارف* اکبر پوری

غزل

تازہ غزل

درد ایسا ہے نہ سہا جائے
اب مجھے زہر دے دیا جائے

مقصدِ زیست ہو چکا پورا
مجھکو مقتول کر دیا جائے

کسطرح طے ہو وہ سفر جس میں
ساتھ قدموں کے راستہ جائے

جس کو کرب و بلا نے گھیرا ہو
جائے جائے وہ کربلا جائے

چار جانب یہاں لٹیرے ہیں
کیسے منزل کو قافلہ جائے

جسکو نفرت ہے میری صورت سے
میری محفل سے وہ چلا جائے

مجھکو وہ آدمی پسند نہیں
حد سے زائد جو بولتا جائے

جو تھا تقدیر میں لکھا وہ ہوا
کفِ افسوس کیوں ملا جائے

جز تشدد، فساد و آہ و بکا
کیا لکھا جائے کیا پڑھا جائے

روٹی سوکھی مگر حلال کی ہے
میری غربت پہ کیوں ہنسا جائے

سید محمد عسکری *عارف*

قصیدہ امام حسن علیہ السلام

باسمہ سبحانہ

نسبت جو گلستاں کو بہار و سمن سے ہے
رشتہ وہ پنجتن کا امام حسن سے ہے

یہ ہے نثار سیدِ مرسل کی ذات پر
قربان اِس پہ حق کا نبی جان و تن سے ہے

تلوار و تیر اور نہ خنجر کا خوف ہے
باطل کو خوف اب بھی قلم اور سخن سے ہے

زہرا و مصطفی و علی اور حسن حسین
دنیا میں روشنی اِنہیں پانچوں کرن سے ہے

کرب و بلا میں جسکو کفن تک نہ مل سکا
حاجت ہمیں کفن کی اسی بے کفن سے ہے

شیعہ ہو گر علی کے تو حق بات بولنا
تو کیا ہوا جو سامنا دار و رسن سے ہے

اُسکو ہی مل سکے گی شفاعت رسول کی
جسکو بھی عشق سبطِ رسولِ زمن سے ہے

*عارف* وہی ہے سنّتِ احمد کا پاسباں
الفت جسے امامِ حسین و حسن سے ہے

سید محمد عسکری *عارف*