جی جی کے مری جاں مجھے مرنا ہے ابھی اور
تنہا یہ سفر زیست کا کرنا ہے ابھی اور
جذبات کی گیرائی میں ڈوبا ہی کہاں ہوں
احساس کے دریا میں اترنا ہے ابھی اور
بادل کو ابھی چیریں گی سورج کی شعائیں
آلام کی گرمی میں نکھرنا ہے ابھی اور
مانند قمر صبح تو میں ڈوب گیا تھا
خورشید کی مانند ابھرنا ہے ابھی اور
مقتل تو کئی بار سجا میرے لہو سے
ہاں مجھکو تہ تیغ سنورنا ہے ابھی اور
مانا کہ تھکن پاؤں کی زنجیر ہے لیکن
عارف کو سرِ راہ گزرنا ہے ابھی اور
باسمہ تعالٰی
وفا و عزم و تحمل کا باب ہے زینب
حسینیت کی مکمل کتاب ہے زینب
چلی ہے اوڑھ کے تطہیر کی ردا سر پہ
دیارِ ظلم میں کب بے حجاب ہے زینب
جلا کے رکھ دے جو ہر دور کی شہی کا غرور
وہ نورِ شمعِ رہِ انقلاب ہے زینب
ستم تو ہار گیا لاکھ کوششیں کر کے
بندھے ہیں ہاتھ مگر کامیاب ہے زینب
سوال رب سے کیا کون مثلِ زینب ہے؟
جواب آیا خود اپنا جواب ہے زینب
نظامِ جبر و تشدد کے خاتمے کے لئے
خدا کا سب سے الگ انتخاب ہے زینب
شہرِ الفت کی کوئی رسم نبھاتے جاتے
لاکھ روٹھا تھا سہی مجھکو مناتے جاتے
کاش ہو جائے کسی پل ترا دیدار سو ہم
راہ تکتے ہیں تری راہوں سے آتے جاتے
خانہء دل کو دھواں کرکے گھٹن چھوڑ گئے
کیا برا ہوتا اگر دل ہی جلاتے جاتے
چند لمحے کو سہی کچھ تو سکوں مل جاتا
اپنے آنسو مرے زخموں پہ گراتے جاتے
ہم نے سوچا تھا گلے ہمکو لگائے گا مگر
ہاتھ بھی اسنے ملایا نہیں جاتے جاتے
ہے خبر تمکو اجالوں سے ہمیں وحشت ہے
تم شبِ ہجر چراغوں کو بجھاتے جاتے
باسمہ سبحانہ
کیا بتاےگا کوئی کیا مرتبہ زینب کا ہے
ساری دنیا ہے خدا کی اور خدا زینب کا ہے
ڈوبتی ایمان کی کشتی کو بعدِ کربلا
ریت کے دریا میں بس اک آسرا زینب کا ہے
بعدِ قتلِ شاہ دشتِ کربلا سے شام تک
منزلیں شبیر کی ہیں راستہ زینب کا ہے
رک نہیں سکتا سرِ عباس نیزے پر کبھی
باوفا بھائی کے آگے سر کھلا زینب کا ہے
آ نہیں سکتا کبھی صبحِ شریعت کو زوال
شام کی ظلمت میں روشن اک دیا زینب کا ہے
ٹل نہیں سکتی دعا ہرگز درِ عباس پر
ہاں اگر ہونٹوں پہ تیرے واسطہ زینب کا ہے
لہجہء شیرِ خدا کی تیغ کے جوہر بھی دیکھ
دشمنِ دینِ خدا سے سامنا زینب کا ہے
اللہ اللہ عظمتِ بنتِ علی، بعدِ حسین
مرضیء سجاد پر بھی فیصلہ زینب کا ہے
دوش پر کوہِ الم ہونٹو پہ شکرِ کبریا
عشق کی معراج ہے یا حوصلہ زینب کا ہے
تختِ شاہی منقلب ہونے میں کچھ ہی دیر ہے
گامزن قصرِ ستم کو قافلہ زینب کا ہے
دل میں اک دیرینہ خواہش ہے خدایا کر قبول
دید میں عارف کی روضہ سیدہ زینب کا ہے
سید محمد عسکری عارف
کٹھن راستوں سے گزر دھیرے دھیرے
مٹا دل سے صحرا کا ڈر دھیرے دھیرے
رہِ خار پر چھوڑ کر مجھکو تنہا
چلے سب مرے ہمسفر دھیرے دھیرے
ہر اک سانس ہے اک قدم سوئے منزل
کٹے زیست کا یوں سفر دھیرے دھیرے
ہمیں ٹھوکروں نے سبق یہ دیا ہے
چلیں سوئے منزل مگر دھیرے دھیرے
خدا جانے کس کے خیالوں میں اپنے
گزرتے ہیں شام و سحر دھیرے دھیرے
بدن سارا تیروں میں الجھا تھا لیکن
گیا اسکا سجدے میں سر دھیرے دھیرے
شرابِ جنوں کا اثر کیا بلا ہے
جلائے جو قلب و جگر دھیرے
یہ آغازِ رسمِ محبت ہے *عارف*
ملاؤ نظر سے نظر دھیرے دھیرے
گماں کا تیر کمانِ یقیں سے نکلا ہے
پھر ایک سانپ مِری آستیں سے نکلا ہے
زمانہ سمجھا تھا مجھکو زمینِ شور مگر
ہرا درخت مِری سر زمیں سے نکلا ہے
غبارِ بیعتِ فاسق جہاں سے اٹھا تھا
یزیدیت کا جنازہ وہیں سے نکلا ہے
ہوا جو گرمیء احساس کا اثر دل پر
ندامتوں کا پسینہ جبیں سے نکلا ہے
ہوا ہے جب سے ہمارا شمار سچوں میں
ہماری ہاں کا بھی مطلب نہیں سے نکلا ہے
سمجھ نہ ریت کے صحرا کو ریگزارِ عطش
ہزار بار سمندر یہیں سے نکلا ہے
ﮐﺴﯽ ﮐﻮ ﻏﻢ ﺗﻮ ﮐﺴﯽ ﮐﻮ ﺧﻮﺷﯽ ﺳﮯ ﻧﻔﺮﺕ ﮨﮯ
ﺳﺘﻢ ﭘﺮﺳﺘﻮﮞ ﮐﻮ ﺁﺳﻮﺩﮔﯽ ﺳﮯ ﻧﻔﺮﺕ ﮨﮯ
ﺟﻮ ﺷﺨﺺ ﺟﺎﻥ ﺳﮯ ﺑﮍﮬﮑﺮ ﻋﺰﯾﺰ ﺗﮭﺎ ﻣﺠﮭﮑﻮ
ﻧﮧ ﺟﺎﻧﮯ ﺁﺝ ﻣﺠﮭﮯ ﮐﯿﻮﮞ ﺍﺳﯽ ﺳﮯ ﻧﻔﺮﺕ ﮨﮯ
ﯾﮧ ﺯﻧﺪﮔﯽ ﻣِﺮﮮ ﺍﻟﻠﮧ ﮐﯽ ﺍﻣﺎﻧﺖ ﮨﮯ
ﻣﯿﮟ ﮐﯿﺴﮯ ﮐﮧ ﺩﻭﮞ ﻣﺠﮭﮯ ﺯﻧﺪﮔﯽ ﺳﮯ ﻧﻔﺮﺕ ﮨﮯ
ﻣِﺮﮮ ﺭﻓﯿﻘﻮﮞ ﻧﮯ ﻣﯿﺮﯼ ﻭﻓﺎ ﮐﺎ ﺧﻮﻥ ﮐﯿﺎ
ﺍﺳﯽ ﻟﺌﮯ ﺗﻮ ﻣﺠﮭﮯ ﺩﻭﺳﺘﯽ ﺳﮯ ﻧﻔﺮﺕ ﮨﮯ
ﮐﻮﺋﯽ ﺭﻓﯿﻖ ﻧﮧ ﺩﺷﻤﻦ ﻣﺮﺍ ﺯﻣﺎﻧﮯ ﻣﯿﮟ
ﮐﺴﯽ ﺳﮯ ﭘﯿﺎﺭ ﻧﮧ ﻣﺠﮭﮑﻮ ﮐﺴﯽ ﺳﮯ ﻧﻔﺮﺕ ﮨﮯ
ﺍﺳﯽ ﻟﺌﮯ ﺗﻮ ﺑﺠﮭﺎ ﮈﺍﻟﮯ ﺁﻧﺪﮬﯿﻮﮞ ﻧﮯ ﭼﺮﺍﻍ
ﮐﮧ ﺍِﻥ ﮨﻮﺍﺅﮞ ﮐﻮ ﺑﮭﯽ ﺭﻭﺷﻨﯽ ﺳﮯ ﻧﻔﺮﺕ ﮨﮯ
ﻭﮦ ﺍﭘﻨﮯ ﺁﭖ ﮐﻮ ﮐﮩﺘﺎ ﮨﮯ ﺑﺎﻏﺒﺎﮞ ﮐﮧ ﺟﺴﮯ
ﮔﻠﻮﮞ ﺳﮯ ﻋﺸﻖ ﮨﮯ ﻟﯿﮑﻦ ﮐﻠﯽ ﺳﮯ ﻧﻔﺮﺕ ﮨﮯ
ﮨﻮﺋﮯ ﮨﯿﮟ ﺩﻭﺳﺖ ﺍﺏ ﺣﯿﻮﺍﻥ ﺁﺩﻣﯽ ﮐﮯ ﻣﮕﺮ
ﺧﻮﺩ ﺁﺩﻣﯽ ﮐﻮ ﮨﯽ ﺍﺏ ﺁﺩﻣﯽ ﺳﮯ ﻧﻔﺮﺕ ﮨﮯ
